Preassadieđáhus, 29.5.2007

Preassadieđáhus

Dato: 29.5.2007
Gulahallanolmmoš: Prošeaktajođiheaddji Sjur Nørstebø Moshagen, tel. mob. +358 50 56 34 319

PRM: Sámediggi almmuha divvunreaidduid beta-veršuvnna

Divvun-prošeakta almmuha dál vuosttaš, almmolaš veršuvnna čállindárkkistanreaiddus mii doaibmá Microsoft Office-páhkas. Microsoft Offices leat earret eará prográmmat Word, Outlook, PowerPoint ja Excel.

Sámi riektačállinreaiddut sisttisdollet čállindárkkisteami davvi- ja julevsámegielaide ja automáhtalaš sátnejuohkkima davvisámegillii. Julevsámegiela sátnejuohkkin almmustuvvo maŋŋelut dan jagis. Buot reaiddut bohtet nuvttá geavahussii, maiddái loahpalaš veršuvdna ja visot Sámedikkis dahkkon gáldokodat leat friddja oažžumis.

Dál eai almmuhuvvo gárvves reaiddut, muhto nu gohčoduvvon beta- veršuvdna, mii lea veršuvdna mas eai galgga leat stuorra teknihkalaš vigit dahje eará vigit, muhto ráhkadeapmi ja testen ii leat loahpalaččat gárvvistuvvon. Divvun-prošeakta doaivu dáinna almmuhemiin oažžut dehálaš dieđuid makkár váilevaš sánit, vejolaš teknihkalaš váttisvuođat ja eará heajos bealit dáid reaidduin leat. Dainna lágiin sáhttá daid divvut ovdal go gárvves veršuvdna almmuhuvvo jagi loahpas.

Riektačállinreaiddut mat dál almmuhuvvojit leat MS Office várás, sihke Windows ja Mac geavahanvuogádagaide. Reaiddut InDesigna ja OpenOffice.orga várás almmuhuvvojit maŋŋil. Reaidduid ođasmahttimat biddjojit jámma sisa.

Reaiddut leat gávdnamis www.divvun.no, ja buot berošteaddjit ožžot daid viežžat. Reaidduid lea maid vejolaš viežžat Sámedikki ruoktosiiddus.

Divvun-prošeavtta jođiha Norgga Sámediggi. Sámediggi, Bargo- ja searvadahttindepartemeanta , Kultur- ja girkodepartemeanta, Máhttodepartemeanta ja Nordplus Sprog leat ruhtadan dan. Prošeavttas lea lagas ovttasbargu Romssa universitehta giellateknologiijabirrasiin. Ovttaiduvvama MS Officiin lágida Polderland Language & Speech Technology bv.