Præssadiededibme, 13.06.2005

Biejvve: 13.06.2005
Kontáktaalmasj:
Prosjæktaåvddåålmåj Sjur Nørstebø Moshagen, tel. mob. +358 50 56 34 319

Sámedigge bijaj jahkebiele rájes jåhtuj prosjeavta manna le ájggomus dahkat sáme korrektuvrranævojt. Prosjækta, mij gåhtjoduvvá Divvun, rahpá dálla ietjas sijddasijdov, manna le almulasj diedo ja ienep prosjevta sissŋálasj diedo.

Sijddasijdo vásstedi vuodogatjálvisá prosjevta birra, nåv gå áiggeplána, åvddånime ja geahttjalamgiehtojt birra, ja galggá liehket ávkálasj diehtogálldo gájkka berustiddjijda.

Divvun-prosjækta adná ållo rabás vuodokåda ietjas bargon, ja galggá aj dibddet nævojt liehket sajij rabás vuodokådan nåv guhkev gå máhttelis. Dakkir prinsihpa milta prosjækta ij dåssjå val bieja almulasj diedojt sijddasijdojda, valla vargga gájkka dokumentasjåvnå aj, mij gullu bargguj. Berustiddje oadtju navti bv. tjuovvu bargov vahkos vahkkuj.

Divvun.no almulasj sijdo galggi liehket moattelágátja, ja le gájkka potensiella addnijda diehti gájkka Nuorttarijkajn. Prosjevta sissŋálasj sijdo le ienemus ieŋŋilsgiellaj. Giellateknoprosjevta e bruvkku diedet ietjasa sissŋálasj dokumentasjåvnå. Diededibme danen dahká ahte unna giellasebrudagátjijn, gejna le miella biedjat jåhtuj ietjasa giellateknoprosjevtajt, le ållo buorep máhttelisvuohta dálla gå åvddål.

Prosjækta ájggu dahkat vuostasj geahttjalamgiehtov stávimkontrållås jahkemålssoma bájke. Dat sjaddá nuorttasáme stávimkontrållå.

Ådå prosjæktasijdojn le almulasj rahpam gasskavahko 22.06.05 d. 12.00 Árrama julevsáme guovdátjin, Ájluovtan.