Præssadiededibme, 10.12.2007

Præssadiededibme

Biejvve: 08.12.2010
Guládallamålmåj: Prosjæktajådediddje Sjur Nørstebø Moshagen, tel. mob. +358 50 56 34 319

Divvun 2.0 almmuheapmi- dál maiddái lullisámegielain

- Deháleamos Divvun 2.0:in lea fállat lullisámegielat veahki, ja prošeakta galgá lassin čállinveahkkái lullisámegielat geavaheddjiide bidjat vuođu ođđa lullisámegielat prošeavttaide main giellateknologiija lea eaktun, lohká Divvun prošeaktajođiheaddji Sjur Moshagen.

Gaskavahkku juovlamánu 8. b. almmuhuvvo Divvun 2.0 Snåases. Divvun- reaidu mii dássážii lea leamaš čállinveahkkin davvi- ja julevsámegillii, almmuhuvvo dál maiddái veahkkin lullisámegillii. Divvun lea čoahkki mas leat korrektuvrareaiddut, ja reaidduin lea stávendárkkisteapmi ja automáhtalaš sátnejuohkin, dábáleamos čállinveahkkereaiddut.

Divvun- reaidu lullisámegillii lea čoahkki mas leat áibbas ođđa veahkkeneavvut lullisápmelaččaide, ja lea oassin áŋgiruššamis ovdánahttit lullisámegiela. Korrektuvrareaiddu vuođđu sáhttá ja boahtá geavahuvvot ođđasit eará oktavuođain ovdánahttit veahkkeneavvuid. Davvisámegielas gávdno juo dárkilis automáhtalaš analyseren teavsttas, giellaoahppoprográmma ja elektrovnnalaš sátnegirjjit mat atnet dan seamma giellateknologiija, ja veahkkeneavvu jorgaleddjiide. Vuođđoresurssat mat gávdnojit Divvun- reaiddus, sáhttet maid adnot ráhkadit seamma lágan reaiddu lullisámegiela várás.

- Dál lea álggahuvvon prošeakta maid Sámediggi ja Romssa Universitehta (Universitetet i Tromsø) ruhtadeaba mas jurdda lea ráhkadit giellaoahpporeaiddu mas vuođđun lea seamma giellateknologiija go dat mii lea adnon Divvun- reaidduin. Eará lassibuvtta prošeavttas lea álgosátnegirji mii atná giellateknologiija gieđahallat buot sojahanmálliid njuolga, nu ahte geavaheaddji sáhttá ohcat buot sátnehámiin, ja oažžut jorgaluvvot, analysa ja vuođđohámi, muitala Moshagen.

Divvun- reaiddut leat nuvttá ja daid gávdná divvun.no, ja leat ovdánahttojuvvon nu gohčoduvvon Sámedikki Divvun- prošeavtta bokte. Vuosttaš Divvun- prošeakta ráhkadii reaiddu davvi- ja julevsámegillii mii lei válmmas 2007. Divvun 2- prošeakta jotkkii dán barggu, ja ráhkadii giellareaiddu maiddái lullisámegillii.

Almmuheapmi lea Pakkhuset nammasaš viesus, Snåases - Gïelem Nastedh lanjain, gaskavahkku juovlamánu 8. b.dii. 10.00. Seammás lea maid preassakonferánsa ja Divvun 2.0 čájeheapmi.

Divvun prošeaktabargit:

  • Sjur Nørstebø Moshagen - prošeaktajođiheaddji
  • Børre Gaup - prošeaktamielbargi
  • Maja Lisa Kappfjell- lullisámegiela lingvista
  • Thomas Omma - davvisámegiela lingvista
  • Tomi Pieski- prográmmerar ja dihtorlingvista